جارى التحميل...

ازاي اعلم ابني يدافع عن نفسه

  • تاريخ الاضافة : September 25, 2017 17:39
  •   |  
  • عدد التعليقات : تعليقات
  • بعض الأطفال لما يتعرضوا لإساءة من أطفال آخرين زي الضرب أو السباب أو السخرية أو إن حد يأخذ حاجتهم أو دورهم، ما بيعرفوش يدافعوا عن نفسهم. وده طبعًا يتعب نفسيتهم، ويعرضهم لمزيد من الاعتداءات لأنهم يتشافوا من الأطفال الآخرين ضعفاء. إزاءي تعلمي طفلك يدافع عن نفسه؟

    الموضوع ما يتمش بين يوم وليلة، ولا هو عبارة عن شوية مهارات بيتعلمها وكفى، ولا هي توجيهات منك إزاي يتصرف في الموقف العلاني ويقول إيه في الموقف الفلاني. هو فعلًا فيه مهارات الطفل بيحتاج يتعلمها، لكن الأهم علاقة الطفل بيكي وبأبوه. العلاقة دي لو اتبنت صح بتكون هي الأساس لإحساسه بالأمان والثقة والقوة اللي يخليه يقدر يدافع عن نفسه. طيب إيه هي شكل العلاقة، وإيه هي المهارات اللي تنتج طفل قوي يقدر يدافع عن نفسه؟

     

  1. اسمحي لطفلك يقول "لا": اقبلي إن طفلك يعارضك، واسمحي له يمشي كلامه أحيانًا، ولو حاجة لابد منها فسايسيه واصبري لحد ما يعملها، وتجنبي تمامًا الإهانة اللفظية والبدنية 
  2. علمي طفلك يعبر عن مشاعره: لما يعيط ما تطلبيش منه يبطل عياط، وما تقوليش جمل زي "الأطفال الحلوين مش يعيطوا"، سيبي له مساحة يعيط. وقفيه عند حده بحزم واحترام لو بدأ يؤذي نفسه، أو يؤذي غيره أو يغلط فيه، لا نه هيتعلم منك يعمل ده مع غيره لو حد غلط فيه. ساعديه يسمي مشاعره، حطي نفسك مكانه عشان تقدري تعرفي هو ممكن يبقى حاسس بإيه. احترمي مشاعره حتى لو مش موافقة على اللي بيقوله أو مش تنفذي له طلبه
  3. علمي طفلك التعبير عن نفسه بطريقة محترمة وحازمة: علميه جمل زي "ده دوري من فضلك، مش مسموح لك تضربني، لو سمحت شيل يدك من عليّ إلخ" 
  4. كوني منصفة: بعض الآباء والأمهات لما بيحصل خلاف بين طفلهم وطفل تأني بياخدوا صف ابنهم حتى لو غلطان، وبعضهم بياخدوا صف الطفل الثاني وبييجي على ابنه ويطلعه غلطان خوفًا إنه يظهر بمظهر المتحيز لابنه. والاثنين مش صح ويطلعوا طفل ضعيف ومنهزم أو مفتري وأناني. خليكي منصفة ومتعمليش حساب لكلام الناس، لو ابنك مظلوم اقفي في صفه، ولو أخطأ عرفيه خطأه من غير إهانة واطلبي منه الاعتذار وإصلاح خطأه. كده الطفل يتعلم الإنصاف هو كمان، وميقبلش الظلم على نفسه أو على غيره
  5. تجنبي استخدام العقاب والقوة البدنية في التربية: لو الطفل اتعود على الاحترام، ها يقدر يميز التعدي عليه في حياته بعد كده ويرفضه بطريقته. وأسلم طريقة عشان طفلك ما يتعرض للاعتداء وما يعتدي على غيره هو إنه يكبر في علاقات فيها حب واحترام. استخدام القوة أو العقاب للتحكم في الطفل بيعلمه استخدام القوة ضد الآخرين أو السماح للآخرين بممارسة القوة ضده
  6. علمي طفلك بعض المهارات الاجتماعية: عن طريق الألعاب ولعب الأدوار في البيت زي إزاي يتعرف على أطفال تأنيين وينضم للعب معهم، لإن أحيانًا الطفل ممكن يرضى بالإساءة في سبيل إنه ينال قبول أقرانه، فمهم إنك توفري له الفرص لإقامة علاقات صحية
  7. علمي طفلك إزاي يرد بهدوء لما حد يسخر منه أو يشتمه: المتنمر يبقى عاوز يحس بالقوة، واستجابة الطفل برد فعل مشحون بالعواطف يحقق له اللي هو عوزه. لذلك مهم يرد بحزم وهدوء في نفس الوقت زي "ميهمنيش كلامك، أنا عندي حاجات تانية أعملها، إلخ" ويمشي ويسيبه
  8. علمي طفلك إنه مش عيب يخاف ويطلب المساعدة من حد كبير، وإنه بكدة ما يعتبر فتان ولا حاجة، وإن المعتدي بيكون عاوز يوهمه بكده عشان يفضل معزول وضعيف 
  9. علمي طفلك لو لقى طفل تأني يتعرض لتنمر، يدعمه بانه يروح يقف جنبه ويأخذه بعيد، أو يروح يقول لحد كبير، وما يقفش يتفرج لإن المتنمر يحب الجمهور 
  10. تدخلي عند اللزوم: عشان الطفل ما يحس إنه مسئول عن التعامل مع الموقف كله لوحده، خاصة لو حسيتي إن الموضوع أكبر من مهاراته أو إن الأذى كبير، أو إن الموضوع بيكبر 
  11. علمي طفلك يتصرف بسرعة أو يبلغك بسرعة أول ما يتعرض لتنمر حتى لو بسيط لإن غالبا البداية بتكون بسيطة كنوع من جس النبض، ولو الطفل سكت المعتدي بالسوق فيها
  12. صدقي طفلك وتجنبي اللوم والعقاب، وخدي موقف إيجابي عشان طفلك يثق فيكي ويطلب مساعدتك
  13.  وأي حاجة عاوزة تعلميها لطفلك محتاجة تتعلمي إنت كمان تعمليها عشان هو بتعلم من تصرفاتك أكتر ما بتعلم من توجيهاتك لو إنت مابتعمليش بيها
  14.  الطفل القوي يبدأ وضع أساسه من الصغر، ويبدأ وضع أساسه من البيت. ومحتاجين نعرف إن القوة اللي بانغراسها في ولادنا سنكون احنا أول ناس يستخدموها معانا، فيا ترى ها نقبل ولا نرجع في كلامنا